"Fernsehen"

Dat Fernseh’n, dat eß ganz geweß,
en werklich toffe Sake eß;
denn me erfäahrt soa allerhand
vam eg’nen on vam fremden Land.

On Felme kresse emmerhenn
soa aff on tu do ok tu senn,
wat enn de Politik seck dööt,
on wie van Dag dä Dollar steht,

wenn ergendwo passiert en Mord,
bekicks deck dinnen Lieblingssport,
on eß en Rennen ergenwo,
dä Ü-Wagen eß längs schonn do.

Enn däm Pantoffelkino drenn
kresse dat alles toff tu senn.
Gesongkheitstips kresse, ganz doll,
on wie me Auto fahren soll,

dann gewt et noch dän ’Denver-Clan’,
on ’Dallas' sütt me ok ens gään.
’Die Vögel', wat soa tragisch endet,
werd getz tum dredden Mol gesendet.

Wie’t Weder werd, dat kickse dann
deck op de Wederkate aan.
Eenmol de Weke ganz geweß
en Quizmaster am bubbeln eß.

On hässe Kabelfernseh'n, dann
kickse deck öwer twentig Programme aan,
kenns nur noch Fernseh'n on häß nit
dann för wat angersch kinne Tiet.

Weil Pitt seck alles aanseh'n mott,
kömmt selws de Liebe dann tu kott.
Sing Frau deshalw, dat eß jo kloar,
deswegen schonn am prötteln woar.

Kömmte no Hus am Nommeddag,
saite ganz kott nur:" Godden Dag!"
Esse em Wohnzemmer dann drenn,
sette seck vöar de Glotze henn.

Do bliwte setten, stief on stur,
on meistens werd et dann een Uhr.
Sing Frau dann schonn de halwe Nait
em Bett enn Morpheus’ leit.

Doch Pitters Arme ganz bestemmt
enn gedem Fall ehr lewer send.
De Ogen eckig, leer on blank,
dä Pitter, dä eß fernsehkrank!

As Pitter gestern kom no Hus,
sing Fräuken fottens met äm schmust.
"Vie können us", sait se tum Pitt,
"en schöanen Owend maken hütt!"

Drop frocht erfreut dä Pitter dann:
"Eß hütt wat Schöanes em Programm?"
"Ach wat", sait do sin Fräuken Ruth,
"dä Fernseher, dä eß kaputt!"

« Vorheriges Gedicht

Inhaltsverzeichnis

Nächstes Gedicht »