"Wenn de Fesche bieten"

Vam Angeln mott me wat verstonn.
Me kann nit eenfach angeln gonn,
et eß noch längs nit eenerlei,
wat me dann bie de Angelei,

soll et wat sinn, för'n Köder nemmt,
dä dann em kloaren Water schwemmt.
Dä eene Fesch op Flegen steht,
bim angern dat mem Wörmken geht,

tufreden kott vöar ehrem Doat
send manke ok mem Stöcksken Broat.
On geder Fesch, wat me ok witt,
am besten jo bie Regen bitt.

Ok morgesfröh, wenn et grad hell,
bieten de Feschkes meistens schnell.
Weil Pitt vam Angeln nix versteht,
ha dröm ok nit tum Angeln geht.

Tukieken? Nä, dat döte nit,
denn eent, dat witt genau dä Pitt,
dat tukieken jo ganz geweß
noch langweil'ger as angeln eß.

As Pitt ens an de Bever woar,
wool hä nit angeln, eß jo kloar,
et wool nur schwemmen ens dä Pitt.
Doch grad an düse Stell, do sitt

en Angler, dä schonn stondenlang
do waat op sinnen groaten Fang.
Gelonnt hät seck dat Angeln hütt
för Petrus'Jünger bes getz nit.

Weil Pitt, en kleen Malör woar dat,
de Badebox vergeten hatt’,
wool hä, me kann dat jo verstonn,
ganz nackicht enn dat Water gonn!

"Eck wöard", sait do dä Angler dann,
"nur met de Box hie baden, Mann!"
Dä Pitter kreech en roaden Kopp.
"Woröm denn dat?" soa frochte drop.

on fröndlich sait dä dann tum Pitt
on grenst dobie: "Öm düse Tiet
bieten de Fesche, lieber Mann,
doch schonn bim kleensten Wörmken aan!"

« Vorheriges Gedicht

Inhaltsverzeichnis

Nächstes Gedicht »