"Arbitsvermeddlong"

Gesondheit twar nit alles is,
doch oahne däm is alles nix.
Doch is dat Lewen eascht komplett,
wenn me dotu noch Arbit hät.

En Arbit, die einem ok gefällt
on godd betallt werd met völl Geld,
domet me seck ok dann on wann
wat Schöanes ens erlauwen kann:

Em Somer Urlaub an de See,
em Wengter Schilopen em Schnee,
för't Wekenenk en Paddelboat,
en toffeWohnong, ganit groat,

paar schöane Belder an de Wank,
en Wohnwagen em Su’erlank,
en Pelzmantel för dinne Frau,
em Keller Wien, em Schrank Schabau,

en dolle Fete dann on wann,
wo me met Frönden froh sin kann.
Doch schloh deck dat all udem Kopp,
hässe kin Geld on kinnen Job.

Nu denk ens aan: Ok use Pitt
woar arbitsloss schonn lange Tiet.
Tweimol de Weke genge dröm
nom Arbitsamt bedröppelt henn.

Hie maute waaren stondenlang.
On kome draan, dann frochte bang:
„Hant Sie en Stelle för meck, Mann?
Eck nehm ok gede Arbit aan!"

Dä Käl vam Arbitsamt sait schleh:
"Eck sök en Mann för morgenfröh,
dä flietig, flott on nit so möd
bim Ärpelernten hölpen döt.

Dä aule Bu'er Schönewald
för'n Morgen fuffzig Euro tallt".
"Eck meut noch weten", Pitter kallt,
"wat dä för’n Nommeddag betallt!?"

« Vorheriges Gedicht

Inhaltsverzeichnis

Nächstes Gedicht »